इंग्लडंच्या ज्या अत्याधुनिक विम्बल्डन ग्रासकोर्टवर स्टेफी ग्राफ, मार्टिना नवरातिलोवा, ख्रिस एवर्ट , शेरिना विल्यम अशा एकापेक्षा एक जागतिक पातळीवरील महिला टेनिसपटू चमकल्या, त्याच कोर्टवर कोल्हापुरची अवघ्या बारा वर्षाची ऐश्वर्या जाधवने आपले या खेळातील ऐश्वर्य चांगलेच झळकवले. कोल्हापुरात भाड्याच्या घरात राहणाऱ्या पण जागतिक पातळीवर आपलं नाव कमविण्याची जिद्द बाळगत त्या दृष्टीने वाटचाल करत असलेल्या या चिमुकल्या ऐश्वर्याला हवा ती खेळप्रेमींच्या मदतीची.
जगातील अतिशय मानाच्या आणि प्रतिष्ठेच्या विम्बडनच्या मैदानात अतिशय कडवी झुंज देत भारतीयांचे लक्ष वेधणारी ऐश्वर्या ही पन्हाळा तालुक्यातील यवलूजची. वडिल दयानंद जाधव हे सर्व्हेअर म्ह्णून काम करतात. मुलीचे खेळात करिअर करायचे म्हणून त्यांनी गाव सोडले. कोल्हापुरात भाड्याच्या घरात नव्याने संसार सुरू झाला. ऐश्वर्याला टेनिस आवड निर्माण झाल्याने त्या खेळात करिअर करायचे ठरवले. पण हा खेळ तसा फारच खर्चिक. तरीही मुलीला या खेळात सर्वोच्च स्थानावर पोहोचवायचे या जिद्दीने वडिलांनी पै पै जमवत खर्च केला. अनेकदा कोल्हापूरकर त्यांच्या मदतीला धावून आले. यातून तिने लहान वयातच या खेळात प्रचंड बक्षिसे मिळविली. भाड्याच्या घरात प्रशस्तीपत्र आणि ट्रॉफींचा ढिग लागला. प्रत्येक गटात चमकदार खेळी करत तिने आपलं नाव भारतभर पोहोचवलं. त्यामुळं तिच्या या खेळीची दखल एशियन फेडरेशन घेतली.
दोन महिन्यांपूर्वी अखिल भारतीय टेनिस असोसिएशनच्या वतीने आयटीएफ जागतिक १४ वर्षाखालील मुलींची टेनिस स्पर्धा झाली होती. या स्पर्धेतील भारतीय संघातून सहभागी झालेली ऐश्वर्या जाधवने चार सामने जिंकत उपांत्य फेरीतील मुसंडी मारली होती. त्यामुळे तिची विम्बडंनसाठी निवड झाली.तेथे उत्तम खेळ कोल्हापूरी ऐश्वर्याचेच प्रदर्शन घडवले. तिने अतिशय चमकदार खेळ करत उपस्थितीत टेनिसप्रेमींची मने जिंकली. जागतिक क्रमवारीत पाचव्या स्थानावर आलेल्या रोमानियाच्या ऍण्ड्रीया सोरविरुद्ध सामना खेळताना ऐश्वर्याने सर्व्हीससह फोर हॅण्ड व बॅक हॅण्डचे वेगवान स्ट्रोकही मारले. पण नंतर तिला पराभव पत्करावा लागला असला चार सामन्यात अतिशय कडवी झुंज देत तिने या खेळातील भविष्यकाळ आपलाच असल्याचे दाखवून दिले.
दोन वर्षापूर्वी आलेल्या महापुरात तिच्या घरातील पदकासह अनेक वस्तू वाहून गेल्या. पण ऐश्वर्याचे स्वप्न कायम आहे. जिद्द कायम आहे. संकटं कितीही येवोत, त्यावर मात करण्याचे सामर्थ्य तिच्यात आहे. तिचे प्रशिक्षक अर्शद देसाई व मनाल देसाई यांनी तिच्या जिद्दीला सरावाची जोड दिल्याने एक ना एक दिवस कोल्हापूरची ही कन्या विम्बडन गाजवणार यामध्ये शंका नाही. पण फक्त तिला जोड हवी ती आर्थिक मदतीची.
कोर्ट
ग्रासकोर्टवर खेळण्याचा कोणताही अनुभव नसताना अतिशय अटीतटीची झुंज देत मी माझ्यातील कौशल्य दाखवून दिले आहेत. हा माझा पहिलाच अनुभव आहे. यापुढे विम्बडनच्या मैदानावर नक्कीच चमकू असा विश्वास आहे.
ऐश्वर्या जाधव
……
केवळ आर्थिक कारणाने तिला परदेशातील ग्रासकोर्टवर प्रशिक्षण देण्यात अडचणी येत आहेत. तीची क्षमता आहे, ती नक्कीच या खेळात चमकेल, पण माती आणि क्रांक्रिटच्या मैदानापलिकडे ग्रासकोर्टवर सराव होणे अत्यावश्क आहे. त्यासाठी मदतीची गरज आहे.
दयानंद जाधव, वडिल
